Sahnada olamshumul shon-shuhratga erishgan bo'lsa-da, hayotda o'ta baxtsiz bo'lgan qo'shiqchi — Uitni Hyustonning fojiali taqdiri

Afsonaviy xonanda Uitni Hyuston hayoti tashqaridan qaraganda muvaffaqiyat, shon-shuhrat va millionlab muxlislar bilan to'la edi. Biroq sahna ortida uning hayoti bolalikdagi ruhiy jarohatlar, giyohvandlik, murakkab oilaviy munosabatlar va shaxsiy fojialar bilan kechgan. Yulduzning o'zi duch kelgan muammolar keyinchalik qizi Bobbi Kristina Braun taqdirida ham takrorlandi. Quyida Uitni Hyuston hayotining eng og'ir va fojiali sahifalarini yoritamiz.

2018-yilda namoyish etilgan “Uitni” hujjatli filmida yulduzga yaqin manbalarning aytishicha, Uitni Hyuston bolaligida ruhiy jarohat olgan va umrining oxirigacha bundan azoblangan.

Hyustonning yordamchisi Meri Jonsning so'zlariga ko'ra, xonandaning xolavachchasi Di Di Uorvik qizga zo'ravonlik qilgan — Uorvik Uitnidan 18 yosh katta edi. Hyuston akasi Gari u ham Uitni kabi bolaligida oila a'zolaridan biri tomonidan zo'ravonlikka uchraganini aytgan, ammo uning aniq ismini sir tutgan. Bu voqealar, ehtimol, Uitni va Garining onasi Sissi Hyuston gastrol safarida bo'lganida sodir bo'lgandir. Aynan shu qo'rquv keyinchalik Hyustonning gastrol safarlarida qizi Bobbi Kristina Braunni o'zi bilan olib yurishiga turtki bo'lgan. Jons, shuningdek, Uitnining giyohvand moddalar iste'mol qilishi bilan bog'liq muammolari uning bolalik davridagi jarohati bilan ham bog'liqligini ta'kidlagan.

Uitnining stilisti Allin Lavardning aytishicha, xonanda akalari bilan birga giyohvand modda iste'mol qilgan, bunday zararli odatni unga aynan akalari o'rgatgan. Hyustonning akasi Maykl qo'shiqchini oq kukun bilan tanishtirganini tan oladi. Lavarning ta'kidlashicha, u ko'p yillar davomida qo'shiqchini davolanishga ko'ndirmoqchi bo'lgan, ammo barchasi behuda ketgan. Uitni dozani oshirib yuborganiga guvoh bo'lgan uning tansoqchisi Devid Roberts jamoaga xonandaning giyohvand moddalar bilan bog'liq jiddiy muammosi borligini aytganida, u shunchaki ishdan bo'shatiladi.

Uitni shon-shuhrat cho'qqisida yashadi, lekin u bunday hayotdan jirkanardi. U hayotda o'ziga hech qanday aloqasi bo'lmagan rolni o'ynashga majbur edi.

“100 foiz o'zi bo'la olmaslik uning uchun dahshatli yuk edi. Hammaning ko'z oldida chiroyli va kuchli bo'lib ko'rinishingiz mumkin, lekin ichingizda ishonchsizlik, shaxsiy muammolar va qiyinchiliklarni yashirishga majbursiz”, deydi insayder.

Uning qo'shimcha qilishicha, Hyuston afsonaviy prodyuser Klayv Devis bilan shartnoma imzolaganidan so'ng uning aytganini qilishi, aytganini kiyishi, u xohlagan qo'shiqni kuylashi va yaxshi qiz bo'lishi kerak edi. Uitni, albatta, bundan norozi edi, lekin u prodyuserning qoidalariga so'zsiz bo'ysunadi. Ehtimol, shu narsa ham xonandaning giyohvandlikka berilib ketishiga sabab bo'lgandir.

Hyustonlar oilasiga yaqin bo'lgan odamning aytishicha, giyohvand moddalarni iste'mol qilishi uning benuqson imiji va uni nazorat qilishga uringan odamlarga qarshi isyoni bo'lgan. Biroq bu vaqt o'tgan sari xonanda giyohvand moddalarga qaram bo'lib qoladi va kundan kunga ahvoli yomonlashadi. Shundan so'ng yulduzning yordamchilari unga xohlagan narsani qilishga ruxsat berishadi. Ular Uitni o'ziga qarshi chiqmoqchi bo'lganlarni ishdan bo'shatishidan qo'rqishardi.

Uitni giyohvand moddalarni turmush o'rtog'i, mashhur qo'shiqchi Bobbi Braun bilan birgalikda iste'mol ham qilgan. Bobbi Braun o'zining kitobida ular buni ko'pincha kichkinagina qizi Bobbi Kristina Braunning ko'z oldida qilishlarini yozgan. Yulduz homiladorligida giyohvand moddalardan voz kechadi, lekin qizi tug'ilgandan so'ng hammasi qaytadan boshlanadi.

“Qizimiz shularning ichida katta bo'ldi. U ota-onasi giyohvand moddalar ta'sirida sarxush ekanligini ko'rdi. Biz undan uzoqroq turishga harakat qilardik, lekin hushyor bo'lganimizda uni ko'rishimiz qiyin edi. Bu ko'p yillar davom etdi. Qizimiz hammasini ko'rdi. Hozir bu haqda o'ylaganimda, qattiq og'riqni his qilaman”, deb eslaydi Braun.

Bundan tashqari, juftlik bir-biriga bir necha bor xiyonat qilgan. Braunning so'zlariga ko'ra, Uitni ko'plab prodyuser va artistlar bilan yaqin munosabatda bo'lgan. Ammo u biror-bir aniq ismni aytmagan.

Aytishlaricha, er-xotin nikohining buzilishiga Braunning rashki sabab bo'lgan. 1992-yilda Hyustonga ulkan shon-shuhrat keltirgan “Tansoqchi” filmi ekranlarga chiqqach, mashhurlikda erini yo'lda qoldirib ketadi. Braunga esa bu yoqmagan. Devid Robertsning ta'kidlashicha, Braun xotinini haqorat qilgan va kaltaklagan, lekin Uitni hammasini kechirib, g'ururini bir chetga surishga harakat qilgan. Uning fikricha, agar qo'shiqchi Braun bilan yashamaganida hali tirik bo'lardi. 2007-yilda er-xotin rasman ajrashdi, qiziga vasiylik huquqi Hyustonga berildi. Shundan keyin u giyohvand moddalarni tashlashga harakat qildi va davolana boshladi, lekin, afsuski, bu unga yordam bermadi.

2012-yilning 11-fevralida Uitni Hyuston Beverli-Xillz mehmonxonasining yuvinish xonasida “Gremmi” mukofotining taqdirlash marosimi oldidan hushsiz holda topildi. Uning hayotini saqlab qolishning iloji bo'lmadi. O'lim sabablari cho'kish, yurak kasalliklari va giyohvandlik deb rasmiylashtiriladi. Rasmiy xabarlarga qaramay, yulduzning sobiq eri uning yuragi azoblangani sababli vafot etganini ta'kidlaydi. Ammo u nimani nazarda tutgani aniq emas.

Mashhur ona fojiali taqdiri uning qizi Bobbi Kristina Braunda ham takrorlandi. 2015-yilning 31-yanvarida uning turmush o'rtog'i Nik Gordon (aslida uning o'gay akasi bo'lib, ancha yillar oldin Uitni Gordonni asrab olgan edi) qizni o'z uyidagi yuvinish xonasidan topdi. Unga qayta tiklanmaydigan miya shikastlanishi tashxisi qo'yildi. Yulduzning qizi sun'iy komaga tushib, uni bir necha oy maxsus uskunalarda tirik ushlab turishdi. Biroq uning salomatligi yomonlasha boshladi va iyul oyida vafot etdi. Sud-tibbiy ekspertiza Bobbi Kristina Braunning o'limiga giyohvand moddalar va cho'kish sabab bo'lganini ma'lum qildi. Biroq uning o'limi tasodifiymi yoki qasddanmi, noma'lumligicha qoldi. Qizning tanasida ko'karish va chandiqlar bo'lgan, lekin hech kim bunga izoh bermagan. Omma esa qizning o'limiga eri aloqador bo'lishi mumkinligi haqida gapira boshladi.

Bobbi Kristinaning yaqinlari uning Gordon bilan bo'lgan munosabatlariga qarshi bo'lgan – eri uni qattiq nazoratda ushlaydi, qarindoshlari bilan gaplashishni taqiqlagan, deb hisoblashardi. Buvisi Sissi Hyuston 2013-yilda Gordonga turmushga chiqmasligini so'rab nevarasiga ochiq xat yozgan. Shunga qaramay, ular so'zidan qaytmadi — qizning fojiali o'limidan 3 kun oldin 9-yanvar kuni turmush qurishdi. Qarindoshlarining aytishicha, ular Bobbi Kristina komada bo'lganida eriga kasalxonada bo'lishini, keyinchalik dafn marosimida qatnashishni ham taqiqlashgan. Gordon bir necha bor zo'ravonlik va sevgilisining o'limiga aloqadorligi haqidagi ayblovlarini rad etgan. Uning so'zlariga ko'ra, u o'sha mudhish kunda uni jonlantirishga harakat qilgan.

2015-yilning yozida Bobbi Kristina Braunning sud tomonidan tayinlangan vasiysi Gordonga qarshi o'limga aloqadorlik aybi bilan 10 million dollarlik da'vo ishi qo'zg'atadi. Unda aytilishicha, o'sha fojiali kunda Gordon xotinini kaltaklagan, keyin esa uning hisob raqamidagi pullarni o'g'irlagan. 2016-yilda sud Gordonga hukm chiqardi — unga Bobbi Kristinaning oilasiga 36 million dollar to'lash majburiyati yuklatildi.

Manba: Daryo.uz

Nahorgi oshga chiqqan, noyob qobiliyatga ega bo'lgan hamda ustozining o'g'liga turmushga chiqqan Yulduz Turdiyeva 41 yoshda

Yulduz Turdiyeva 1985-yili Buxoro viloyatida dunyoga kelgan. Oilasida san'atkorlar yo'q bo'lishiga qaramay, u bolalikdan maqom qo'shiqlariga qiziqqan. Xonanda bolaligi bilan bog'liq voqealarni quyidagicha eslaydi.

Foto: Instagram

— Erka qiz bo'lganman, ota-onam nima desam ham, yo'q deyishmasdi. Ammo nihoyatda qo'rqoq bo'lganman. Hatto maktabga ketayotganimda yo'limdan mushuk chiqib qolsa ham, qo'rqib uyga qaytib kelardim. Bu odatlar haligacha saqlanib qolgan. Shu bilan birga, nihoyatda mehribon va qo'li ochiq qiz bo'lganman. Onam uyimiz yonida kichik do'koncha ochgan. U yerda shokolad, pechenye kabi mayda-chuyda shirinliklar ham sotilardi. Ularni olib, sinfdoshlarimga tarqatardim. Onam “Shuncha shokolad qani? Nima qildinglar?” desa, indamay turaverardim, — deydi xonanda Yulduz Turdiyeva.

“15 yoshimgacha onam yonimda bo'lgan”

Yulduz Turdiyevaning san'atkor bo'lishiga qarshiliklar bo'lgan. Ammo uni birinchi navbatda ota-onasi qo'llab-quvvatlagan.

— San'atkor bo'lsa, unday, bunday bo'ladi, degan gap-so'zlar hamisha bo'lgan. Shu bois yaqinlarim hamisha atrofimda bo'lishga, yomon niyatli odamlardan himoya qilishga harakat qilishgan. O'n besh yoshimga qadar onam hamisha men bilan birga bo'lgan. Hech bir tadbir yoki ko'rik-tanlovga yolg'iz yuborishmasdi. Keyinchalik bu vazifani akam bajargan, hozirgi kunda esa turmush o'rtog'im men bilan birga, — deydi xonanda.

​“Ustozimning o'g'liga ko'ngil qo'yganman”

Xonanda turmush o'rtog'i bilan san'at kollejida o'qigani va qaynotasidan tahsil olgani haqida so'zlab berdi.

— Turmush o'rtog'im bilan tengdoshmiz, u bilan Buxoro san'at kollejida birga o'qiganmiz. Qaynotam ikkimizga ustozlik qilgan, keyin Buxorodan birga Toshkentga kelib, O'zbekiston davlat konservatoriyasiga hujjat topshirganmiz. Men qo'shiq aytardim, turmush o'rtog'im esa dovul chalardi. Ammo hech qachon bu inson bilan oila qurishim haqida o'ylab ko'rmaganman. Ikkinchi kursda o'qiyotganimda menga bo'lgan munosabatlari o'zgarayotganini sezib qolganman. Kursdoshlardan rashk qilishni boshlagan. Yozgi ta'til kunlari men Toshkentda qolardim, u qaynotam bilan to'y xizmatlariga chiqish uchun Buxoroga ketardi. Ikki oy men uchun nihoyatda og'ir o'tganini his qilardim. Chunki Ulug'bek eng yaqin kursdoshim va himoyachim edi. Xullas, ustozimning o'g'liga ko'ngil qo'yganman, deydi Yulduz Turdiyeva.

“Qishda oynasiz ijara uyda yashaganmiz”

Yulduz Turdiyeva turmush o'rtog'i bilan o'rtahol oilada kamol topgan. Bundan tashqari, o'sha yillari Toshkentda doimiy ro'yxatda turmagan insonlarning yaxshi ishga joylashishi ham muammo edi. Xonanda hayotidagi eng og'ir kunlarni quyidagicha eslaydi.

— Turmush o'rtog'im bilan Toshkentga kelganimizda hech narsamiz yo'q edi. Ishonasizmi, bir yil ichida 10 ta ijara uyda yashashimizga to'g'ri kelgan. Sharoiti yaxshisining puli to'g'ri kelmasdi. Yoki puli to'g'ri kelganining sharoiti qoniqarsiz darajada bo'lardi. Birinchi qavatdagi deraza oynasi yo'q xonadonda yashaganimiz hech esimdan chiqmaydi. Kimdir kirib kelsa, nima qilaman, deb tong otgunga qadar uxlolmasdim. Hatto bunday ijara uyga o'g'limni olib kelishga qo'rqib, uni qaynonamga tashlab kelgandim. U paytlarda propiskasizlarni yaxshi ishga olishmasdi. Shu bois turmush o'rtog'im bilan ishga joylashishga qiynalganmiz. Hatto qoniqarsiz darajadagi uyni ijaraga olishga ham pulimiz qolmagandi. O'shanda turmush o'rtog'imning do'stlaridan birining bir xonali uyiga ko'chib o'tgandik. U uyda o'ndan ortiq kishi yashab, bitta qozondan ovqat yerdik, deydi xonanda Yulduz Turdiyeva.

“Meni g'oliblikka undagan his — ona mehri”

Ijara uydagi sharoit sabab bolasidan ayro yashashga majbur bo'lgan xonanda xalqaro musobaqaga katta miqdordagi mukofot puli qo'yilgani haqidagi xabarni o'qib qoladi. Onalik mehri uni tanlovda ishtirok etish va g'alaba qozonishga undaydi.

— Bolamni sog'inib yurgan paytimda Ozarbayjonda o'tkaziladigan Baynalxalq mug'om festivali haqidagi e'lonni o'qib qolganman. Bosh sovrin uchun 15 ming AQSH dollari degan joyini o'qib, ko'zlarim porlab ketgan. O'zimcha bu pulga uy sotib olish haqida rejalar tuzganman.

“Qorabaxshi” qo'shig'i — Ozarbayjon yuragi deyilarkan. O'zbekiston davlat konservatoriyasida ishlaydigan Ochil Matjonovdan qo'shiqni o'rgatishini so'raganman. O'n ikki kun davomida konservatoriyadan ketmay, qo'shiqni o'rganganman. 2009-yili o'tkazilgan mug'om festivalida g'olib bo'lib, ilk katta mukofotni qo'lga kiritganman. Toshkentga qaytganimdan keyin uy olish harakatiga tushganman. Hammasi niyatga yarasha bo'lar ekan, o'sha paytda 15 000 AQSH dollariga shahar markazidan ikki xonali uy berardi. Uy sotib olib, oilam bilan unga ko'chib o'tganmiz. Bu festival hayotimga quvonch olib kirgan. G'olib bo'lishimga esa onalik mehri sabab bo'lgan, — deydi xonanda Yulduz Turdiyeva.

“Bahodir Yo'ldoshevdan tanbeh eshitganman”

Yulduz Turdiyeva “Sharq taronalari”da qatnashgan yili rejissyor Bahodir Yo'ldoshevdan tanbeh eshitgani va yig'lab yuborgan kunlarini quyidagicha eslaydi.

— “Sharq taronalari” festivaliga tayyorgarlik bir necha oy davom etardi. Ilk marta qatnashgan yilim bir inson kelib, farzandining to'yida ishtirok etishimni qattiq iltimos qilgan. “Yo'q, bu yerdan ketolmayman”, deganman. Ammo u inson ham oyoq tirab turib olgan. Oxiri repititsiya bo'lmaydigan vaqtga to'yni to'g'rilab, borib kelishni reja qilganmiz. Aksiga olib, o'sha vaqtda rejissyor Bahodir Yo'ldoshev meni izlab qolgan ekan. To'yga ketganim haqida eshitib, rosa jahli chiqqan. Menga qattiq tanbeh berib, festivaldan ham chetlashtirmoqchi bo'lgan. Yig'lab vaziyatni tushuntirganim ham foyda bermagan. Faqatgina ertasi kuni “Mayli, bu senga oxirgi ogohlantirish” degan, deydi xonanda.

“Siz turmush o'rtog'ingizdan ko'p pul topasiz”

Yulduz Turdiyeva turmush o'rtog'i nega sozandalik qilmayotgani va unga nisbatan negativ fikr bildiradigan insonlarga quyidagicha javob bergan.

— Ilgari to'y va konsertlarda turmush o'rtog'im sozandalik qilardi. U professional va o'z kasbini sevadigan inson edi. Ammo oila qurganimizdan keyin ma'murlik va sozandalik qilish uni biroz charchatib qo'ydi. Shundan keyin “Ulug'bek, siz sozandalik qilmay, yonimda bo'lsangiz bo'ldi”, dedim. Chunki ma'murlikning ham bosh og'riqlari ko'p. “Siz turmush o'rtog'ingizdan ko'p pul topasiz”, deb unga nisbatan negativ fikr bildirayotganlardan ranjiyman. Chunki odamlar bilan ishlash qiyin, agar u ma'murlik qilmaganida, men bemalol qo'shiq aytolmagan bo'lardim, — deydi Yulduz Turdiyeva.

“Boshqa san'atkorlarning qo'shig'ini kuylab, jarima to'laganman”

— Bir necha yil avval “Navo” telekanalining bir qancha jonli ijro ko'rsatuvlarida chiqib, O'zbekiston xalq artisti Nasiba Abdullayeva hamda marhum xalq artisti Ortiq Otajonovlarning retro qo'shiqlarini kuylagan edik. Bir kuni meni chaqirishib, ko'rsatuvda jonli ijroda aytgan qo'shig'im uchun jarima to'lashim kerakligini aytishdi. Bunga sabab, qo'shiq so'zlarini xato aytganim va ijro etish uchun shoirdan ruxsat so'ramaganim ekan. Bu bir necha yil avvalgi ko'rsatuv ekanini, o'zlari ruxsat berganliklarini aytsam ham, “so'zlarni xato aytib, ma'naviy zarar yetkazgansiz”, deyishdi. Xo'p, mayli, deb jarimani to'ladim. Hozir ham kanallardan retro qo'shiqlarni kuylash uchun chaqirib turishadi, lekin endi hech qaysi xonandaning qo'shig'ini kuylamayapman.

Bundan tashqari, ba'zi san'atkorlar bilan ham tushunmovchilik holatlari bo'lgan. O'zlari hurmat qilib, bitta qo'shiqlarini ijro etishga berishgan edi. Tarona mening talqinimda chiroyli chiqqanidan so'ng anglashilmovchiliklar kelib chiqdi. U ijodkorni ham tushunaman, qo'shig'idan umidi katta bo'lgan. Lekin birgina kichik holat kutilmagan natijalarni keltirib chiqardi. Bu voqea konsertim arafasida sodir bo'lgani uchun biror muammo chiqmasin deb, o'shanda 60 million so'm jarima to'lashga majbur bo'lganman.

“Yulduz Usmonova va Ozodbek Nazarbekovga rahmat aytaman”

— To'y xizmatlarida, fotiha marosimlarida Yulduz Usmonova va Ozodbek Nazarbekovning qo'shiqlarini ham ijro qilib turaman. Odamlar ularning qo'shiqlarini yaxshi ko'rishadi, sevib eshitishadi. O'zbekiston xalq artisti Yulduz Usmonovaga alohida rahmat aytaman, u kishi hech qachon qo'shiqlarini qizg'anmagan. Hattoki, o'zlari “qizim, ovozing borida hamma qo'shiqlarimni kuyla”, degan. Ozodbek Nazarbekov ham qo'shiqlarini hech qachon qizg'anmagan.

“Nahorgi osh tadbirlariga chiqishdan Zulayho Boyxonova to'xtatgan”

— Avvallari Samarqand va Urgutda saharlab nahorgi oshlarga xizmatga chiqardim. Bu tadbirlar tong sahardan soat o'n ikki-bir, ba'zan ikkigacha ham davom etardi. Jonli ijroda klassik qo'shiqlar, laparlar aytardim. Oshga chiqishni to'xtatishimga Zulayho Boyxonova sabab bo'lgan.

Opa bilan Toshkentda to'y xizmatida birga bo'lgan paytimizda, ertasi kuni soat beshda boshlanadigan “osh”ga shoshilayotganimni aytdim. Zulayho opa avvaliga menga hayron bo'lib qaradi. “Yulduz, oshga chiqma. Yo to'ylarda xizmat qil, yoki oshda. Bu ketishda 5-10 yildan keyin sog'ligingda jiddiy muammolar paydo bo'ladi”, deb maslahat bergan. Maqom yo'nalishi bo'yicha tahsil olganman, ularni kuylashni juda yaxshi ko'raman. To'ylarda ko'pincha sho'x, to'ybop qo'shiqlar so'rashadi, shuning uchun o'zbek klassik, retro qo'shiqlarni faqatgina nahorgi oshlarda ijro etolardim. Lekin Zulayho opaning maslahatlaridan so'ng buni ham butunlay to'xtatganman.

Xonandaning noyob qobiliyati haqida

— Bolaligimda akam bexosdan tangalarni yuz-qo'llarimga qo'yganida, ular qo'yilgan joyida yopishib qolardi. Gohida onamning yoki farzandlarimning oyoqlarini uqalab qo'ysam, qandaydir shifo topishadi. Kichkinaligimda gazetalarda mening mana shu biotokim haqida yozishgan edi. Shundan so'ng mahallamizda buni eshitgan, bilganlar bosh og'rig'ini yoki yana qandaydir og'riqlaridan qutulish umidida uyimizga kelishardi. Yoshim katta bo'lgandan keyin odamlardan uyalishni boshladim va buni butunlay to'xtatdim, deydi xonanda Yulduz Turdiyeva.​

Yulduz Turdiyeva hayotini Instagram'siz tasavvur qila oladimi?

— Menimcha, hozirgi kunda hech kim hayotini ijtimoiy tarmoqlarsiz tasavvur qilolmaydi. Men ish yuzasidan xorijlik prodyuserlar bilan ham hamkorlik qilaman, chet ellarda konsertlar tashkil etamiz. Masalan, yevropaliklar uchun kechalari maqom konsertlari uyushtiramiz. Xuddi shunday, boshqa davlatlarda ham muxlislarimiz uchun dasturlar tayyorlaymiz. Instagram orqali barcha to'y-tantanalar, boshqa davlatlardagi konsert dasturlarini o'tkazish bo'yicha takliflarni qabul qilaman. Shunday ekan, nima uchun Instagram'dan voz kechishim kerak, deydi xonanda.

Manba: Daryo.uz

Ronalduning nikohi haqidagi mish-mishlar sabab 2 mingdan ortiq muxlis begona to'yga keldi (video)

O'tgan shanba, 8-avgust kuni Krishtianu Ronalduning to'yini kutgan bir guruh muxlislari uning ona shahri – Madeyra orolidagi Funshal soborini qurshab oldi. Biroq o'sha kuni cherkovda ikki nafar mahalliy fuqaro nikohdan o'tayotgan bo'lib chiqdi.

8-avgust kuni ertalab Ronaldu va uning sevgilisi Jorjina Rodrigesning shu yerda turmush qurishi haqida tabloidlar tarqatgan yolg'on xabarlardan so'ng sobor oldida 2 mingdan ortiq odam to'plandi. Mahalliy OAVning yozishicha, juftlik to'y bazmi uchun sobor yaqinidagi besh yulduzli Savoy Palace mehmonxonasini ham band qilib qo'ygan.

Ammo muxlislar futbolchining emas, balki Fabio Ramos va Fotima Nikol Kunya Teysheyralarning nikoh marosimiga tashrif buyurdi. Yosh kelin-kuyov qarindoshlari va do'stlari bilan birga nikoh o'qiladigan soborga kirish uchun olomonni yorib o'tishga majbur bo'ldi.

“Bu aqlga sig'maydi. Nega hamma Fabioni Krishtianu Ronaldu deb o'ylayapti? Kelin bu tartibsizlik to'yini buzib qo'yishidan qo'rqib, juda xafa bo'lyapti”, dedi mehmonlardan biri.

Funshal sobori ruhoniysi Markos Gonsalves o'sha kuni boshqa marosimlar rejalashtirilmaganini tasdiqladi:

“Bugun bu yerda bo'lib o'tadigan yagona nikoh marosimi shu. Menda Krishtianu Ronaldu uchun buyurtma yo'q”.

Ronalduning o'zi esa bu voqeaga munosabat bildirib, ijtimoiy tarmoqlardagi nikoh marosimi videosi ostida kulayotgan smayliklar qoldirdi.

Eslatib o'tamiz, Ronaldu va Rodriges 2016-yildan beri birga bo'lib, besh nafar farzandni tarbiyalaydi: kichik Krishtianu, surrogat onadan tug'ilgan egizaklar Yeva va Mateo, hamda ikki qizi — Alana Martina va Bella Esmeralda.

Juftlik o'tgan yilning avgust oyida unashtirilganini e'lon qilgandi. O'shanda Jorjina Rodriges hashamatli nikoh uzugini ko'rsatib, Krishtianuga rozilik berganini ma'lum qilgandi. Shundan so'ng futbolchi qaylig'ini bir necha bor qimmatbaho sovg'alar — Porsche Taycan elektromobilidan tortib, eksklyuziv soatlar, dizaynerlik sumkalari va kiyimlari bilan xursand qilgandi.

Manba: Daryo.uz

Kino tarixidagi eng ko'p gonorar olgan aktyor bolalar

Rivojlangan mamlakatlarda nafaqat taniqli aktyorlarga, balki yosh bolalarga ham turli kino loyihalarida debyut qilish va mashhurlikka erishish imkoniyati mavjud. Shunday aktyorlar borki, ular erta bolalikdanoq murakkab bo'lgan shou-biznes olamiga kirib kelgan va hali voyaga yetmay turib mo'may daromad olishga erishgan.

Milli Bobbi Braun – har bir epizod uchun 350 ming dollar

Foto: MSN

“Ajabtovur ishlar” filmi orqali 11yoshli aktrisa katta boylikka ega bo'ladi. Serialning ilk qismlarida u har bir epizod uchun 100 ming dollardan 250 ming dollargacha ishlab topgan bo'lsa, keyinchalik 4-mavsumda aktrisa 300 ming dollardan 350 ming dollargacha oylik oladi. Biznes insayderlar ma'lumotlariga qaraganda, Milli Netflix bilan shartnoma tuzgan, shu bois ham maoshini qaytadan muhokama qilolmagan.

Fin Volfhard, Noa Shnapp, Kaleb Maklaflin, Gaten Matarazzo va Sedi Sink kabi aktyorlar ham serialdagi rollari orqali 7 mln dollardan ko'proq daromad qilishdi.

Selena Gomes — har bir epizod uchun 30 ming dollar

Qo'shiqchi va aktrisa 2007—2012-yillar oralig'ida olingan “Veyverli Pleys sehrgarlari” filmidagi epizodi uchun 25 ming dollardan 30 ming dollargacha maosh olgan. Aktrisaning birinchi ishi uchun o'sha vaqtda yomon mablag' bo'lmagan.

“Zamonaviy oila” filmidagi bolalar — har bir epizod uchun 125 000 dollar

Sara Haylend, Ariel Vinter, Nolan Guld va Riko Rodrigeslarga filmdagi har bir roli uchun 70 000 dollardan maosh berilgan. Yettinchi mavsumga kelganda esa ularning maoshi 125 000 dollar bo'lgan. Film 2009-yildan 2020-yilga qadar suratga olingan.

Opa-singil Olsenlar — har bir epizod uchun 80 ming dollar​

Olsenlar 15 oyligidan boshlab filmlarda suratga tushgan. Boshlanishida ularga har bir epizod uchun 2,400 to'lashgan bo'lsa, keyinchalik ularning maoshi 80 ming dollarga ko'tariladi.

Franki Muniz — 150 000 dollar​

Franki “Diqqat markazidagi Malkolm” filmidagi har bir epizodi uchun 30 ming dollardan ishlab topdi va serialdagi muvaffaqiyati oxirgi mavsumida eng yuqori cho'qqisiga chiqadi. Aktyorga so'nggi mavsumdagi roli uchun 150 ming dollar to'landi.

Angus Ti Jons — 350 000 dollar​

Ti Jonsga “Ikki yarim erkak” filmidagi roli uchun 350 ming dollar to'langan. Film 2003-yildan 2013-yilga qadar davom etganini hisobga oladigan bo'lsak, Jons ham u bilan rol ijro etgan Jeyk Harper ham anchagina boylik orttirishganini taxmin qilish mumkin.

Viktoriya Jastis — 50 ming dollar

Amerikalik qo'shiqchi va aktrisa ko'plab filmlarda rol ijro etgan bo'lib, ulardan biri “Zoui 101” komediyasidir. Ajablanarlisi shundaki, aktrisa ushbu film orqali 50 000 dollar, “G'olib Viktoriya” loyihasidan esa 12 000 dan 180 000 dollargacha maosh olgan. Film 2005—2008-yillar davomida suratga olingan bo'lib, aktrisa talaba qiz rolini ijro etgan.

Miranda Kosgrouv — 180 ming dollar​

Miranda Amerikalik aktrisa, qo'shiqchi, bastakor hamda faol xayriyachidir. U aktrisalik faoliyatini 3 yoshda televideniye reklamalarida rol o'ynashdan boshlagan. “Aykarli” filmi orqali aktrisa har bir epizod uchun 180 ming dollar olgan. Umumiy maoshi esa 18 million dollar bo'lgan. Miranda 2012-yili Ginnes rekordlari kitobiga ham eng ko'p maosh oluvchi qiz sifatida kiritilgan.

Teylor Jeyms Uilyams — 250 ming dollar​

Teylor Jeyms “Barcha Krisdan nafratlanadi” filmi orqali anchagina boylikka ega bo'lgan. Film 2005—2009-yillar oralig'ida suratga olingan bo'lib, aktyorga 250 ming dollar foyda keltirgan. Filmning birinchi mavsumi vaqtida aktyor endigina 12 yoshni qarshilagan edi.

Gari Koulman — 70 ming dollar​

“Turli zarbalar” filmi orqali Gari 1,500 dollar maosh oladi. Filmning mashhur bo'lishi ortidan esa 70 000 dollar ishlab oladi. Hozirda bu mablag' 200 000 dollarga teng. Filmda u Arnold Jekson rolini o'ynagan bo'lib, film unga katta muvaffaqiyat olib keldi.​

Diqqat markazidagi Malkolm”

Manba: Daryo.uz

“Amerikada kuryer bo'lib ishladim”. Ulug'bek Qodirov nima sababdan O'zbekistondan ketgani va hozirda to'ylarda qo'shiq kuylayotgani haqida

Uzoq yillardan buyon muxlislar sog'ingan aktyor Ulug'bek Qodirov AQSHdan O'zbekistonga qaytgach, ilk marta intervyu berdi. Ijodkor suhbat davomida oilasini ommaga ko'rsatmasligi sababi, musofirchilikdagi hayoti, yetkazib berish xizmatida ishlagani hamda to'ylarda qo'shiq kuylayotgani haqida gapirdi.

Ulug'bek Qodirov ijodining eng gullagan davrida deyarli barcha aktrisalar u bilan partnyor bo'lib rol ijro etishga tayyor bo'lgan. Xo'sh, aktyorning o'zi uchun qaysi aktrisa bilan rol o'ynash qulay va unga qaysi tandem katta muvaffaqiyat olib kelgan?

Foto: Google Images

— Ko'cha-ko'yda odamlardan asosan “Telba” filmiga maqtov ko'p eshitaman. Lekin undan-da ko'pini “Fotima va Zuhra” filmidan Shahzoda bilan ijro etgan rolimdan eshitganman. Dilnoza Kubayeva professional aktrisa, kursdoshim Gulchehra Eshonqulova bor, Zilola Musayeva xonanda bo'lgani bilan “Fotima va Zuhra”da maromiga yetkazib o'ynagan. Hatto filmda yashagan. Lola Yo'ldoshevada ham tug'ma qobiliyat bor, rolga kirishib ketadi. Shu to'rtta aktrisa bilan hozir ham maza qilib rol ijro eta olaman deb o'ylayman. Lekin Zilola bilan juftligimiz ko'proq yaxshi chiqardi, deydi aktyor.

Shou-biznes vakillari orasida Ulug'bek Qodirovni qattiqqo'l oila boshlig'i deb ta'riflashadi. Aktyor oilasini ommaga ko'rsatmasligining sababi ham shundanmi?

Foto: Instagram

— Oila a'zolari kimgadir quloq solishi kerak-ku, axir. Qattiqqo'l deganda bolalarni urib, qamab qo'yadigan yomon ota emasman, albatta. Tushuntirishga harakat qilaman. Rahmatli otam ham samimiy, mehribon odam bo'lgan. Oilamni nega ommaga tanishtirmaganimga kelsak — buni xohlamayman. Farzandlarim tarbiyasida mening rolim 60 foiz. Hayotda pishsin, o'rgansin deb ko'p narsani cheklamayman ham, deydi u.

Ulug'bek Qodirov ijodining eng cho'qqisiga chiqqan paytda faoliyatida tanaffus qilib, Amerikaga ketdi va u yerda qariyb 4 yil yashadi. Buning sababi nima edi?

— Hech kim, hech narsa meni Amerikaga ketishga majbur qilmagan. Odamlar negadir meni butunlay ko'chib ketdi deb o'ylashdi. Men yoshligimdan sayohat qilishni yaxshi ko'raman. Ungacha ham okean ortiga ko'p borib kelardim. Agar u yerda qolib, yashashni orzu qilganimda boshidanoq shunday qilgan bo'lardim.

Men qiziq bir paytga tushib qoldim. Asosiy maqsadim Amerikada uzoqroq sayohat qilish edi. Har safar borganimda oilamga “Sizlarni ham olib boraman, sizlarga ham ko'rsataman”, deb va'da berardim. Bo'ydoqlik paytlarimda Universal Park'da oilasi va farzandlari bilan sayr qilib yurganlarga havas qilardim. “Xudoyim, men ham farzandlarim bilan shu yerga kelay”, deb niyat qilardim. Niyatimga ham yetdim. Ammo bu safarim karantin davriga to'g'ri kelib qoldi va o'sha yerda qolib ketdim. Aslida sayohat uchun borgan edim. Vaziyat taqozo qilgani uchun mashina oldim, o'zbek tanish-bilishlarim yordamida ijaraga uy ham topdim, deydi Ulug'bek Qodirov.

“Amerikada yetkazib beruvchi bo'lib ishladim”

— Amerikada qariyb 4 yil yashadim. Rostini aytsam, yetkazib beruvchi bo'lib ishladim. Pitssada ishlashni xohlamadim. Garchi u yerda bundan yaxshi pul topish mumkin bo'lsa-da, bu ishni qilishni istamadim. Turli kastinglarda ham qatnashib ko'rdim. Ammo buning uchun ingliz tilini juda yaxshi bilish kerak ekan. Kino orqali tarbiyaviy ma'no yetkazish men uchun muhim. Balki, musulmon bo'lganim ham vatanimga qaytish qarorimga ta'sir qilgandir. Hayotimning bu qismi men uchun juda qadrli, deydi aktyor.

“Bizda 40 yoshdan keyin aktyorlarga rol yo'q”

— Aktyorlarning eng og'riqli nuqtalaridan biri bor: Amerikada ko'plab aktyorlar 40 yoshdan keyin ham mashhurlikka erishadi. O'zbekistonda esa aktyor shu yoshga kelganda rollar kamayib ketadi. Ko'pi bilan ota, tog'a yoki amaki rollari taklif qilinadi. Chunki ssenariy ham, qahramon ham kam. Asosan yoshlarning sevgi-muhabbati haqida filmlar suratga olinadi. Natijada qolgan aktyorlar chetda qolib ketadi.

Men aslida bunday tanaffus qilishni rejalashtirmagan edim. Ammo vaziyat shunga to'g'ri keldi. Pandemiya sababli tanaffusim yanada cho'zildi. Keyin vatanimga kelib-ketdim. Oxir-oqibat kino sog'inchi va vatan sog'inchi bilan O'zbekistonga qaytdim. Kelganimdan so'ng “O'zbek arsloni” filmiga kasting topshirdim va undan o'tdim. Film sentyabr oyidan kinoteatrlarda namoyish etiladi. Bu urush haqidagi film. Unda farg'onalik partizan rolini ijro etdim, deydi u.

“Gollivuddan taklif tushsa ham rad qilishim mumkin”

Foto: YouTube

— Menga tomoshabin sifatida horror, triller janri yoqadi. Hozir onlayn platformalar uchun ham kinolar suratga olinyapti. Menga shu janrdan taklif tushsa, salbiy qahramonni ijro etishga ham rozilik beraman. Ochiq sahnalariga esa aralashmayman. Hatto Netflix'da ham kino suratga olishning shunday talablari borki, bu bizning tarbiyamizga to'g'ri kelmaydi. Gollivudning katta kinokompaniyasi taklif bilan chiqsa ham ochiq sahnalar bo'lsa, shaxsan men yo'q deb javob beraman, deydi aktyor.

“Aslida xonanda bo'lishni xohlaganman”

— Qo'shiq aytish hobbiyim. Aslida san'atga aktyor bo'laman deb kelmaganman. Konservatoriyaga borganimda musiqiy bilimim yo'qligi sabab ortimga qaytarib yuborishgan. Shundan keyingina san'at institutiga topshirganman. Kino, teatr, syomkalar bilan bo'lib, bu xohishim qalbimning bir chekkasida qolib ketgandi. Meni shunchaki mehmon sifatida to'ylarga taklif qilishadi. Kelin-kuyovni ikki og'iz tabriklab qo'yganimda, to'y egalari cho'ntagimga pul solishadi.

She'r aytishni xush ko'rmayman, evaziga nimadir qilib men ham javob qaytarishim kerak-ku. Shuning uchun professional ijodkorlar bilan studiyada qo'shiq yozdim. Hozir ham xonandalikka da'vo qilmayman, men hali ham aktyorman. Hozir nafaqat Toshkent va viloyatlarda, qo'shni davlatlardan ham xizmat takliflari tushyapti, deydi Ulug'bek Qodirov.

Manba: Daryo.uz

Keyt Blanshett “Kalmar o'yini”ning Amerika versiyasida suratga tushmaydi

Amerikaning Netflix striming platformasi rejissyor Devid Fincher tomonidan “Kalmar o'yini” seriali asosida ishlanishi rejalashtirilgan loyihadan voz kechdi. Mazkur loyiha serialning ingliz tilidagi spin-offi bo'lishi kerak edi.

Ma'lumotlarga ko'ra, 2024-yil oxirida OAV Devid Fincher mashhur serialning spin-offi ustida ishlashi haqida yozgan. Dastlab loyiha to'liq metrajli film sifatida rejalashtirilgan, keyinchalik uni “Heckler” ishchi nomi ostidagi serialga aylantirish ko'zda tutilgan.

Syujetda voqealar Shimoliy Amerikada bo'lib o'tishi, suratga olish ishlari esa Buyuk Britaniyada tashkil etilishi rejalashtirilgan edi. “Kalmar o'yini”ning final qismida amerikalik aktrisa Keyt Blanshettning ishtiroki ham loyihaga bo'lgan qiziqishni oshirgandi.

Ko'pchilik uning serial finalidagi chiqishini o'yinlarning AQSHda davom etishiga ishora sifatida qabul qildi. Biroq loyiha ijodkorlari bu taxminni rad etdi. Rejissyor Devid Fincher esa Netflix uchun boshqa loyihalarga, xususan, “Kliff Batning sarguzashtlari” filmiga e'tibor qaratdi. Mazkur film Kventin Tarantinoning “Bir paytlar Gollivudda” kartinasining davomi hisoblanadi.

Manba: Daryo.uz

Sevimli qahramonlar qaytmoqda: mashhur asarlar asosida qayta ekranlashtirilgan 10 ta film

Sevimli kitob yoki bolalikdagi hikoyangizning ekranda jonlanishini tomosha qilishning o'zi bir zavq. Quyida maktab dasturidagi asarlar, xorijiy romanlar va mashhur detektivlar asosida suratga olingan, zamonaviy talqindagi 12 ta film jamlangan. Ular orasida ta'sirli melodrama, kulgili komediya, fantastika va seriallar ham bor.

Foto: Universal Pictures

Rejissyor Kristofer Nolan sirli trillerlari, dramalari va komikslar asosidagi filmlari bilan mashhur. Bu safar esa u ilk bor yunon mifologiyasiga murojaat qildi. Gomerning Itaka qiroli haqidagi dostoni 2004-yilda “Troya” filmi orqali allaqachon ekranlarga ko'chirilgan.

Film aktyorlar tarkibi bilan ham e'tiborni tortadi: Mett Deymon, Enn Xeteuey, Robert Pattinson, Sharliz Teron, Tom Holland, Zendeya va boshqalar. Yana bir qiziq jihati — film kompyuter grafikasidan foydalanmasdan, to'liq IMAX plyonkali kameralarida suratga olingan. Dekoratsiya o'rniga haqiqiy kemalar va ochiq havoda maxsus lokatsiyalar qurilgan.

Foto: Filmdan kadr

Bolaligimizdagi sevimli “Ayozbobo” ertagining zamonaviy ekranlashtirilgan versiyasi. Klassik versiyalardan farqli ravishda, yangi talqinda Marfusha va Nastya shunchaki o'gay opa-singillar emas, balki yaqin dugonalar sifatida tasvirlanadi. Ular birgalikda o'z qishlog'iga tushgan tavqi la'natga qarshi kurashadi.

Ijodkorlar klassik syujetni aynan takrorlashdan ko'ra, sevimli ertak janrida yangi hikoya yaratishni ma'qul ko'rgan.

“Los-Anjelesdagi talonchilik”

Foto: Amazon MGM Studios

Bu film tomoshabinni so'nggi daqiqalargacha qiziqishda ushlab turadi. Bir guruh tergovchilar ma'lum yo'nalish bo'ylab sodir etilayotgan bir qator jasur talonchiliklarni fosh etishga urinadi. Bosh qahramon esa shu qadar ayyor va ehtiyotkorki, ortidan deyarli hech qanday iz qoldirmaydi.

Film odatiy jangovar kartinalardan farq qiladi. Unda qahramonlarning xarakteri, fikrlari va yashirin maqsadlariga katta e'tibor berilgan. Qizig'i, rejissyor Bart Leyton filmni yanada ishonarli qilish uchun haqiqiy talonchilar bilan maslahatlashgan.

Foto: Nashe kino

Aleksandr Pushkin ertagining yangi talqini tomoshabinlarga kuzda taqdim etiladi. Syujetga ko'ra, Masha va Vanya Pushkin ijodiga bag'ishlangan ekskursiya vaqtida tasodifan sehrli portalga tushib qoladi. Ular ertak qahramonlarini haqiqiy hayotda ko'rib, hayratga tushadi.

Endi bolalarning asosiy maqsadi uyga qaytish yo'lini topish va yo'lda yangi do'stlariga yordam berishdan iborat. Maktab dasturidagi “Lukomorye” bilan ulg'ayganlar uchun oilaviy tomosha sifatida mos keladi.

Foto: ВГТРК

Pushkin asarining yana bir zamonaviy ekranlashtirilishi. Bu safar rejissyor film bilan cheklanmay, miniserial yaratgan. Unda Pyotr Grinyov va Masha Mironovadan tashqari Yemelyan Pugachyov obrazi ham muhim o'rin egallaydi. Ushbu rolni Yevgeniy Tkachuk ijro etgan.

Loyihada Sergey Bezrukov, Fyodor Dobronravov va Yekaterina II rolida Viktoriya Isakova ham ishtirok etgan.

Foto: Walt Disney Pictures

Disney o'zining mashhur “Oppog'oy va yetti mitti” animatsion filmi asosida yangi versiyani taqdim etdi.

Biroq zamonaviy talqinda malika shunchaki shahzodaning kelib, uni qutqarishini kutmaydi. U Yovuz qirolichadan taxtni qaytarib olishni maqsad qiladi. Rejissyor Mark Uebb va ssenariynavis Greta Gervig qahramonni “yordamga muhtoj qiz” obrazidan uzoqlashtirib, unga ko'proq mustaqillik va qat'iyat bergan.

Foto: “Vodorod” kinokompaniyasi

Yilning eng bahsli yangiliklaridan biri. Shunga qaramay, filmning 7,1 ballik reytingi tomoshabinlar yangi talqinni ma'qullaganini ko'rsatadi.

Sehrli kalit yordamida Karlo ota eng katta orzusiga — o'g'il farzandli bo'lishga erishadi. Keyinchalik filmning asosiy yovuz qahramoni Karabas-Barabasni ijro etgan Fyodor Bondarchuk yog'och bolakayni o'z teatriga olib ketadi. Qolgan voqealar Aleksey Tolstoy asaridagi syujet asosida rivojlanadi.

Qiziq jihati shundaki, film saundtrekini 1975-yildagi mashhur ekranlashtirish uchun ham musiqa yozgan kompozitor yaratgan. Yangi film premyerasi original kartinaning 50 yilligiga to'g'rilangan.

Foto: Warner Bros

Emili Brontening shu nomdagi romani asosida suratga olingan, Margo Robbi va Jeykob Elordi bosh rollarni ijro etgan film. Rejissyor asarni oddiy klassik talqinda ekranlashtirishni maqsad qilmagan.

Tanqidchilarga ko'ra, film bahsli chiqqan. Ketrin Ernsheu o'sha davr uchun odatdagidan ko'ra erkin fikrlaydigan va injiqroq qiz sifatida tasvirlangan. Filmda asosiy e'tibor esa Ketrin va Xitklif o'rtasidagi sevgi munosabatlariga qaratilgan.

“Tergovni qo'zichoqlar olib boradi”

Detektiv janrisiz bu ro'yxat to'liq bo'lmasdi. Bu safar jinoyatni tergov qiladiganlar — odamlar emas, balki qo'zichoqlar.

Cho'pon Jorj rolini ijro etgan Xyu Jekman har kuni kechqurun qo'zichoqlariga detektiv hikoyalar o'qib beradi. Bir kuni Jorj sirli tarzda halok bo'ladi. Qo'zichoqlar bu oddiy o'lim emasligini tushunib, ishni o'z qo'llariga — aniqrog'i, tuyoqlariga olishga qaror qiladi.

Foto: Agatha Christie Productions

Agata Kristining shu nomdagi romani asosida suratga olingan yana bir detektiv. Voqealar 1925-yilda Chimneys qishlog'idagi hashamatli qarorgohda bo'lib o'tadi.

Bir guruh yosh aristokratlar tushgacha uxlashni yaxshi ko'radigan do'sti Jerriga hazil qilish uchun uning xonasiga yettita budilnik yashirib qo'yadi. Ammo ertalab ularning hazilini shokli sukunat kutib oladi: Jerri vafot etgan, uning yonida esa o'sha yettita budilnik turibdi.

Yosh Ledi Bendl Brent voqeani mustaqil ravishda tergov qilishga kirishadi. Bosh rollarda Martin Friman, Helena Bonem Karter va Mia MakKenna-Bryus.

Manba: Daryo.uz

“Troya” filmidagi ko'zga tashlanmaydigan kinoxatolar: Axillesning emlash izi va Parisning tugamaydigan o'qlari

Volfgang Petersenning “Troya” tarixiy jangari filmi 2004-yilning eng kutilgan kartinalaridan biri bo'lgan. Rejissyor talqinidagi uch soatdan ortiq davom etadigan film ulkan dekoratsiyalar, shiddatli jang sahnalari va yulduzli aktyorlar tarkibi bilan tomoshabinlarni hayratga solgan. Kartina kassada muvaffaqiyat qozongan bo'lsa-da, tanqidchilar dramatik jihati sust ekanini ta'kidlab, unga turlicha baho bergan.

Yuqori budjetga qaramay, filmda tarixiy noaniqliklar va kinoxatolar anchagina uchraydi. Ayniqsa, liboslar o'sha davrga to'liq mos kelmasligi ko'p tanqid qilingan. Vaqt o'tishi bilan esa tomoshabinlar yana ko'plab mayda xatolarni ham payqay boshladi.

Filmning bosh qahramoni — mirmidonlar sardori Axilles. Uni o'sha paytda ijodining eng cho'qqisida bo'lgan Bred Pitt gavdalantirgan.

Foto: “Troya” filmidan kadr

Biroq aktyorning chap yelkasidagi emlash izi bir qancha sahnalarda yaqqol ko'rinib qoladi. Masalan, Briseida bilan chodirdagi suhbat sahnasida bu iz kichik kesilgan yara yordamida yashirilgan bo'lsa, Axillesning jasadi kuydiriladigan epizodda esa butunlay yo'qolib qoladi. Taxminlarga ko'ra, bu sahnada aktyor o'rniga unga o'xshash qo'g'irchoqdan foydalanilgan.

Yana bir xato Axillesning uzun sochlari bilan bog'liq. Troya qirg'og'iga yaqinlashayotgan kemada u askarlariga murojaat qilayotgan paytda sochlari kemaning harakatiga teskari tomonga hilpiraydi. Aslida esa kemalar yelkan yordamida aynan shamol esayotgan tomonga qarshi harakatlana olmas edi.

Zamonaviy buyumlar ham kadrga tushib qolgan

Troya qirg'og'iga tushishdan oldingi sahnalardan birida mirmidon Evdor tarixiy ko'rinishdagi zirh kiygan bo'lsa-da, oyoq kiyimining tag qismi zamonaviy poyabzallardagidek chuqur protektorli ekanini ko'rish mumkin.

Qirg'oqqa tushish sahnasida yana bir askar o'q yeb yiqilganda dubulg'asi bilan birga sun'iy sochi ham tushib ketadi.

Film davomida yoritish uskunalari aks etgan tasvirlar va suratga olish texnikasining soyasi ham bir necha bor ko'rinadi. Masalan, Axilles va Gektor jang qilayotgan paytda Gektor nayzasini yo'qotgach, qum ustida kamera kranining V harfiga o'xshash soyasi yaqqol ko'rinadi.

Qurollar bilan bog'liq xatolar

Troya devorlari yonidagi janglardan birida Gektor ortga qaytayotganda yo'lida yunon askarlarigagina xos bo'lgan o'roqsimon qalqon ko'targan jangchi paydo bo'ladi. Uning atrofida ham yunon zirhini kiygan yana bir necha jangchini ko'rish mumkin. Ehtimol, statistlar tasodifan noto'g'ri guruhga qo'shilib qolgan.

Axilles va Gektor duelida ham e'tibordan chetda qolmagan xato bor. Axilles qalqoni bilan Gektorning nayzasini sindirganida yog'och notekis sinadi. Ammo keyinchalik nayzaning bo'lagi Gektorga sanchilganda u mutlaqo tekis kesilgandek ko'rinadi.

Parisning “cheksiz” o'qlari

Film yakunida Troya yonayotgan paytda Paris Axilles va Briseidani ko'rib, ularga qarata o'q uza boshlaydi.

Qizig'i, u ilk kadrda sadoqida atigi uchta o'q bilan ko'rinadi. Shunga qaramay, Axillesga beshta o'q otadi, keyin esa oltinchi o'qni kamonga qo'yadi. Buning ustiga, sadoqda yana ikkita o'q qolganini ham ko'rish mumkin.

Bu esa “Troya”dagi eng mashhur va kulgili kinoxatolardan biri sifatida tilga olinadi.

Manba: Daryo.uz