Ikki kun pastlagan dollar kursi ko'tarildi

Manba: “Daryo” / Farrux Aliyev

Markaziy bank xorijiy valyutalarning o'zbek so'miga nisbatan 7-avgustda amalda bo'ladigan qiymatini e'lon qildi.

dollar 28,92 so'mga ko'tarilib, 11 915,64 so'm bo'ldi;

yevro 32,19 so'mga oshib, 13 749,46 so'm bo'ldi;

rubl 0,18 so'mga tushib, 146,19 so'mni tashkil etdi.

Bundan avval dollar kursi ketma-ket ikki kun pastlab, 11 886,72 so'm bo'lgandi. Bunday past ko'rsatkich 2025-yil dekabridan buyon qayd etilmagandi. Ushbu valyuta kursi 3-avgustda 12 ming so'mdan tushgandi.

Manba: Daryo.uz

Dollar rasmiy kursi yana ko'tarildi

Manba: “Daryo” / Farrux Aliyev

Markaziy bank xorijiy valyutalarning o'zbek so'miga nisbatan 10-avgustda amalda bo'ladigan qiymatini e'lon qildi.

dollar 36,46 so'mga ko'tarilib, 11 952,10 so'm bo'ldi;

yevro 30,12 so'mga oshib, 13 779,58 so'm bo'ldi;

rubl 0,98 so'mga tushib, 145,21 so'mni tashkil etdi.

Bundan avval ketma-ket ikki kun pastlagan dollar kursi ko'tarilib, 11 915,64 so'm bo'lgandi. Ushbu valyuta kursi 6-avgustda 11 900 so'mdan tushgandi.

Manba: Daryo.uz

O'zbekiston oltin-valyuta zaxiralari iyulda qariyb 590 mln dollarga oshdi

Manba: Bloomberg

O'zbekiston oltin-valyuta zaxiralari qiymati iyundagi pasayishdan so'ng yana o'sishni boshladi.

Markaziy bank ma'lumotlarida keltirilishicha, 1-avgust holatiga ko'ra, mamlakatning jami oltin-valyuta zaxiralari 64,34 mlrdni tashkil etdi. Bir oy ichida ko'rsatkich 589,75 mln dollarga oshdi.

Zaxiralardagi oltinning qiymati 56,12 mlrd dollarni tashkil etib, bir oyda 365,3 mln dollarga oshdi. Qayd etilishicha, oy davomida oltin narxining 4016,70 dollardan 4052,20 dollargacha o'sishining ta'siri 0,49 mlrd dollarni tashkil etdi.

Oltinning fizik hajmi esa biroz kamayib, bir oy avvalgi 13,88 mln troya unsiyasidan 13,85 mln troya unsiyasiga (taxminan 430,8 tonna) tushdi.

Zaxiralarning valyuta qismi 7,65 mlrd dollarni tashkil etdi. Bu bir oy avvalgi qiymatdan 208,8 mln dollarga ko'p. Boshqa banklardagi naqd valyuta va depozitlar hajmi 5,89 mlrd dollarga yetdi.

Xorijiy qimmatli qog'ozlar hajmi sezilarli kamaydi. Iyul oxirida u 1,76 mlrd dollarni tashkil etdi.

Jahon oltin kengashi ma'lumotlariga ko'ra, O'zbekiston yarim yilda 41 tonna oltin xarid qildi. Iyun oyidagi eng faol xaridorlar qatorida Polsha Markaziy banki 19 tonna va Xitoy 15 tonna ko'rsatkich bilan yetakchilik qilmoqda. O'zbekiston esa 9 tonna oltin xarid qilib, uchinchi o'rindan joy olgan.

Manba: Daryo.uz

“2025-yilda eng ko'p korrupsion jinoyat sodir etgan shaxslar Andijonda aniqlangan” — senator

Manba: Senat/Abduhakim Eshmurodov

O'zbekistonda 2025-yilda 7 517 kishi korrupsion jinoyati sabab javobgarlikka tortilgan. Bu haqda 8-avgust kuni o'tgan Senat majlisida senator Abduhakim Eshmurodov ma'lum qildi.

Uning ta'kidlashicha, yil davomida korrupsiyaga oid jinoyatlar ortidan davlat manfaatlariga 2,9 trillion so'mdan ortiq zarar yetkazilgan.

“Eng ko'p korrupsiyaga oid jinoyatlarni sodir etgan shaxslar Andijon (946 nafar), Toshkent (793 nafar), Qashqadaryo (745 nafar), Samarqand (709 nafar) va Namangan (509 nafar) viloyatlarida aniqlangan. Sohalar kesimida aksariyati maktabgacha va maktab ta'limi muassasalari (580 nafar), mahalliy hokimliklar (497 nafar), sog'liqni saqlash tashkilotlari (404 nafar), tijorat banklari (245 nafar) hamda oliy ta'lim muassasalari (161 nafar) xodimlari jinoiy javobgarlikka tortilgan”, dedi senator.

Foto: Senat

Abduhakim Eshmurodov korrupsion jinoyatlar ko'payganini ularni fosh etish faolligi ortgani bilan izohladi. Shu bilan birga, vazirlik va idoralardagi ichki nazorat tuzilmalari faoliyatida samaradorlik yetishmayotganini aytdi.

“Bu esa korrupsiyani oldini olish maqsadida tashkil etilgan komplayens-nazorat tuzilmalari ayrim tashkilotlarda profilaktika vositasi sifatida emas, balki hisobot taqdim etish bilan cheklanayotganidan dalolat bermoqda”, dedi Senat vakili.

Avvalroq 2025-yilda korrupsiyaga oid huquqbuzarlik haqida xabar bergan yoki mazkur jinoyatga qarshi kurashishga ko'maklashganlar jami 3,5 million so'm mukofot olgani xabar qilingand i.

Manba: Daryo.uz

Muammoli kreditlarning 70 foizdan ortig'ini davlat banklari ajratgan — Markaziy bank

Manba: “Daryo”

O'zbekistonda muammoli kreditlarning 70 foizdan ortiq qismini davlat banklari ajratgan. Bunga oid raqamlar Markaziy bank e'lon qilgan tahlilda keltirilgan.

2026-yil 1-iyul holatiga ko'ra, respublikadagi banklarning muammoli kreditlari miqdori 22,94 trln so'mni tashkil etgan. Shundan qariyb 16,44 trln so'mi davlat banklari berib, qaytara olmayotgan qarzlar hisoblanadi.

Eng ko'p muammoli kreditlar O'zmilliybankda — 3,2 trln so'm. Keyingi o'rinlarni Agrobank (3,19 trln so'm), O'zsanoatqurilishbank (1,98 trln so'm), Asaka bank (1,9 trln so'm) va Mikrokreditbank (1,8 trln so'm) egallagan. O'z navbatida Xalq banki (1,5 trln so'm) va Biznesni rivojlantirish bankiga (1,48 trln so'm) qaytarilmayotgan qarzlar ulushi yuqori hisoblanadi.

Oxirgi bir yilda davlat banklari orasida Mikrokreditbank ajratgan qarzlarning muammoli qismi nisbatan yuqori — 613 mlrd so'mga ko'paygan. Shu bilan birga, Aloqabankka qayotarilmayotgan kreditlar bir yilda 401 mlrd so'm, Agrobankniki esa 394 mlrd so'mga oshgan. Davlat banklari orasida O'zsanoatqurilishbank muammoli kreditlar ulushini 562 mlrd so'mga, Xalq banki 346 mlrd so'mga kamaytirishga erishgan.

Muammoli kreditlarning 6,5 trln so'mi xususiy banklar hissasiga to'g'ri keladi. Jumladan, o'z muddatida qaytarilmagan qarzlarning 1,1 trln so'mini Ipotekabank ajratgan. Yana 1 trln so'mi Tibisi bank, 901 mlrd so'mi Anrobank, 822 mlrd so'mi Kapital bank undira olmayotgan kreditlar hisoblanadi. Qolgan xususiy banklar muammoli kreditlari yarim mlrd so'mdan kam.

So'ngi bir yilda xususiy banklar orasida Anorbank ajratgan kreditlarning muammoli qismi 586 mlrd so'mga, Tibisi bankniki 582 mlrd so'mga ko'paygan. Bu davrda Ipoteka bank muammoli qarzlar ulushini 1,2 trln so'mga, Kapital bank esa 1,1 trln so'mga kamaytirishga erishgan.

Avvalroq O'zbekiston aholisining banklardan olgan kreditlari qoldig'i bir yilda 39,5 trln so'mga ko'paygani ma'lum qilingandi.

Manba: Daryo.uz

O'zbekistonda dollar rasmiy kursi tushdi

Manba: “Daryo” / Farrux Aliyev

Markaziy bank xorijiy valyutalarning o'zbek so'miga nisbatan 11-avgustda amalda bo'ladigan qiymatini e'lon qildi.

dollar 17,49 so'mga tushib, 11934,61 so'm bo'ldi;

yevro 8,47 so'mga oshib, 13788,05 so'm bo'ldi;

rubl 0,57 so'mga tushib, 144,64 so'mni tashkil etdi.

Avvalroq dollar rasmiy kursi ko'tarilib, 11 952,10 so'm bo'lgan edi. 6-avgustda amalda bo'ladigan qiymatda esa ushbu valyuta 11 900 so'mdan ham pastlagan.

Manba: Daryo.uz

Ruminiya qo'ng'ir ayiqlar soni ko'paygani sabab ovlash kvotasini ikki baravar oshirdi

Manba: straitstimes.com

Ruminiya hukumati mamlakatdagi qo'ng'ir ayiqlar sonini nazorat qilish va odamlar xavfsizligini ta'minlash maqsadida ayiq ovlash bo'yicha yillik kvotani deyarli ikki baravar oshirdi. Biroq ekologlar va tabiatni muhofaza qiluvchi mutaxassislar bu chora ayiqlarning aholi yashash hududlariga kirib kelishi muammosini bartaraf etmasligini ta'kidlamoqda. Bu haqda Reuters yozmoqda.

Ruminiyaning mashhur Transfegerashan tog' yo'lida atigi uch soat ichida kamida 20 ta qo'ng'ir ayiq o'rmondan chiqib, avtomobillar yoniga kelgan. Sayyohlar esa taqiqlovchi ogohlantirishlarga qaramay, ayiqlarni oziqlantirib, ular bilan suratga tushgan.

Mazkur yo'l bo'ylab o'rnatilgan belgilar yovvoyi hayvonlarni oziqlantirish noqonuniy ekani va buning uchun katta miqdorda jarima belgilanganini eslatadi. Shunga qaramay, ko'plab sayyohlar bu qoidalarga amal qilmayapti.

Ruminiya Atrof-muhit vazirligining dastlabki DNK tadqiqotlariga ko'ra, mamlakatda 10 mingdan 13 mingtagacha qo'ng'ir ayiq yashaydi. Bu Rossiyadan tashqari Yevropadagi eng yirik qo'ng'ir ayiq populyatsiyasi hisoblanadi.

So'nggi yillarda ayiqlarning odamlar bilan to'qnashuvi tobora ko'paymoqda. Mutaxassislar bunga shaharlarning kengayishi va iqlim o'zgarishi oqibatida tabiiy yashash muhitining qisqarishi sabab bo'layotganini aytmoqda. Oziq-ovqat izlagan ayiqlar endi muntazam ravishda qishloq va shaharlarga kirib kelmoqda.

Ruminiya Atrof-muhit vazirligi ma'lumotlariga ko'ra, so'nggi 20 yil ichida ayiq hujumlari oqibatida qariyb 30 kishi halok bo'lgan.

Mutaxassislar: muammo ovda emas, qonunlar ijrosida

Yangi qonunga ko'ra, Ruminiya 2026 va 2027-yillar uchun qo'ng'ir ayiqlarni ovlash kvotasini 900 boshga yaqin miqdorgacha oshirdi.

Biroq ekologlar bunga qarshi chiqmoqda. Ularning fikricha, ovchilar asosan o'rmondagi yirik trofey ayiqlarni ovlaydi, aholi yashash joylariga oziq izlab kirayotgan urg'ochi ayiqlar va bolalariga esa deyarli tegmaydi.

Ruminiyadagi Libearty ayiq qo'riqxonasining rahbari Kristina Lapisning aytishicha, ayiqlar ko'pincha yo'l bo'ylariga va aholi punktlariga kelayotgan bir paytda ularni chuqur o'rmonlarda ovlash muammoni hal qilmaydi.

2021-yildan buyon Ruminiyada mahalliy hokimiyatlarga odamlarning hovlisi yoki uyiga kirgan ayiqlarni otib tashlash vakolati ham berilgan.

Shu bilan birga, Climate Adaptation Platform Association tashkiloti vakili Siprian Galushka mavjud qonunlar yetarli darajada bajarilmayotganini aytdi. Uning so'zlariga ko'ra, ayiqlarni oziqlantirganlik uchun jarimalar, chiqindilarni to'g'ri saqlash talablari va elektr to'siqlar o'rnatish uchun ajratiladigan subsidiyalar amalda samarali qo'llanmayapti.

Mutaxassislar fikricha, ayiqlar sonini qisqartirishdan ko'ra, mavjud qoidalar ijrosini kuchaytirish odamlar va yovvoyi hayvonlar o'rtasidagi to'qnashuvlarni kamaytirishda samaraliroq bo'lishi mumkin.

Manba: Daryo.uz